ناشطة تونسية توجه رسالة الى زياد العذاري بعد تعيينه على رأس وزارة التنمية والاستثمار

أثارت تسمية “زياد العذاري” على رأس وزارة التنمية والاستثمار الدولي عدة انتقادات خاصة بعد فشله في تسيير وزارة التجارة.

واعتبر رواد مواقع التواصل الاجتماعي أن العذاري غير قادر على تسيير وزارة بقدر وزارة الاستثمار بسبب انتماءاته الحزبية وطبيعة العلاقات بين حركة النهضة وتركيا.

ومن جانبها كتبت الناشطة فردوس بوغطاس تعليقا على هذه التسمية على صفحتها بموقع التواصل الاجتماعي وهذا نصها:

“إلى زياد العذاري.. أنجح وزير سابق في بر تونس،
هيا مبروك على بلادنا الاستثمار والتعاون الدولي الي بش يبركوا مرة واحدة .. كيما بركت الصناعة والتجارة .. والتشغيل هذاكة ما نحكيش عليه احسن ..
زيدون يا سمح .. ما نوصيكش عالاستثمار عاد … أمانة عليك ليوم الدين .. هتكو وبركو .. عندي فيك ثقة عمياء .. راك وليدها و”قدها وقدود” على رأي أشقائنا ولاد أم الدنيا …
اقصمطوبلاه يا زيدون ثيقتي فيك عمياء وما عندها حتى حدود … اقصمطوبلاه نعرفك اكثر واحد قادر تدڨدڨ ما تبقى من ها الوزارة وترجعها كدس خراب… أقصمطوبلاه نعرفك خبرة عالية في تدمير الاقتصاد… اقصمطوبلاه نعرفك كفاءة رهيبة في تخريب الدولة .. أقصمطوبلاه نعرفك عندك ولاء لأعداء تونس هوما بيدهم ما عندهمش منو…
وراس بيت ربي يا انت هدرة فيك أصل أصل .. راني كي نتذكر انجازاتك في وزارة الصناعة والتجارة.. راني نندم وصوابعي ناكلهم ڨوفرات الي ما زدتش قعدت فيها عام آخر .. راك ابدعت يا معلم .. راك وريتنا شيء عمرنا لا كنا نحلمو بش نشوفوه.. سكرت آلاف المؤسسات متاع النسيج والأحذية .. شردت آلاف الخدامة .. بركت القطاع…ردمت الشوارع والأسواق والزناقي والانهج بشوالق تركيا .. وصبابط تركيا .. وبلاستيك تركيا .. وحليب تركيا وياغرت تركيا وبسكويت تركيا وشكاليط تركيا .. لا .. وخدمة نظيفة نظيفة .. خدمت في إطار اللامركزية التجارية .. معناها تركيا ما استنفعوش بيها كان سكان العاصمة والمدن الكبيرة .. لا بالعكس .. ناخذو مثال القلوب البيضاء.. دخلت لكل ربوع الخضراء.. وصلت لبلايص مازال ما وصلتلهاش الستاغ والصوناد … خدمة عظيمة ياسر .. وقتلي كنت انت على راس وزارة التجارة يا عذاري .. الميزان التجاري دخل لصبيطار الرازي من كثر الاختلال الي عندو …. الي تسالهولنا تركيا ديون ليوم .. ما يبني تونس ويعاود اعمار ليبيا… الي يشوف الأرقام متاع المديونية لقردوغان .. يقول السيد يصدرلنا في السلاح والسفن والصناعات الثقيلة… وهوما ديون متاع شوينڨوم وبسكويت وكيسان وبرغل وحلبة وحمص ودبابش وحلالم ونواصر … ماك قلتلنا الواردات هاذي ضرورية لحياتنا وبلاش بيها ما نعيشوش .. و d’ailleurs ما نعرفش كيفاش كنا عايشين قبل ما تجينا يا زيدون … أن شاء الله برك تكون ريڨلتلنا جونا مع تركيا قبل ما تخرج مالوزارة .. وان شاء الله تكون عملتلنا اتفاقيات تشدنا ألفين سنة اخرين … بش ما نحسوش رواحنا يتامى من بعدك …
بالنسبة للوزارة الجديدة … عوم بحرك .. واقترح عليهم يحولولك البيرو لتركيا ولا حتى للسفارة التركية .. بش تبدأ الخدمة نظيفة وكل حاجة على عين اردوغان …
وابدا من تو خمم في الوزارة الجاية … خاطر التحوير الوزاري ما عادش يبطى .. وانت بطبيعتك قضاء وقدر وملزمك علينا الباي … ما فماش حكومة من غيرك ….
فردوس بوغطاس الشورابي