المصدر تونس المصدر آخر الأخبار العربية والعالمية والتونسية .
أثنى النائب ياسين العياري في تدوينة على صفحته الرسمية ، اليوم الإثنين 21 ديسمبر 2020 ، على ما إعتبره تصرف رئيس الحكومة المثالي في التعاطي مع وزير البيئة المقال وملف النفايات الإيطالية.
اعتبر العياري أن المشيشي تصرف بمثالية ودون ضجيج حيث أقل الوزير المتورط في فساد الصفقة دون ” ضجيج وأفلام وقام بما يجب فعله دون تزويق أو إختلاق نظرية مؤامرة أو تتفيه للواقائع ” ، حسب تعبيره.
وفي ما يلي تفاصيل التدوينة:
“””شنوة؟؟
إعفاءات؟ إقالات؟ إيقافات؟ منهم وزير و مديرين عامين؟؟
ياخي هكة يتحارب الفساد هو؟؟
المفروض يخرج علينا المشيشي، يقلنا الي عملوه حكومته ماهوش فساد، مجرد إخلالات، تجاوزات، الغلطة موش في وزيره، الغلطة في القوانين الخايبة، في الإدارة، في الناس الكل أما أبدا موش فيه! و تقرير الرقابة غالط، و هو ينزه وزرته و هذه مؤامرة من الناس الي تصطاد في الماء العكر خاطر هو يحارب في اللوبيات الي يحبوا يطيحوله حكومته و ما ثماش قصة من أصله!
ياخي ما تعلم شي من حكومة “مكافحة الفساد” متع الفخفاخ؟ من قضية الكمامات؟
هكة راهو يتحارب الفساد، برشة كلام و تفليم و تفشليم!
موش بالإعفاءات و الإقالات و الإيقافات!
تي شبيك سي هشام؟ التوانسة يحبوا الي يتكلم و يراوه بطل، موش الي يفعل!
إي إي التونسي يحب هكاكة،
يحب الي يقله راني نحارب في الفساد و أقوى حاجة عملها إتفاق بالكلمة لا معنى و لا أثر قانوني له مع مروان مبروك و سوقها إنتصار!
يحب الي يقله “حد ما على راسه ريشة” و أقوى حاجة عملها قصان نهارين للموظفين.
يحب الي يقله نحاربوا في اللوبيات، و هو حكومته لوبي نصر علي شقرون!
التونسي يحب الي يقله، الي يفلم عليه، الي يحكي ياسر!
تقوم إنت ما تحكيش و تعمل؟ هكة يا مشيشي؟
هذه إخرتها؟
ما عطيتش الثقة ليك و لحكومتك، ما صوتلكش على قانون المالية متاعك، عشرات الأخطاء الإتصالية و السياسية ليك و لوزرتك ما عديتلك حتى وحدة، قلت عليك بصراحة و وضوح “جبان” في الإعلام لإنقاذك لوديع الجريء في اللحظات الأخيرة في ملف الشابة و كان رأسا أينع سياسيا و حان قطافه، لكن الحق حق!
التصرف في ملف النفايات الإيطالية مثالي و تستحق عليه رفع القبعة : بدون ضجيج، بدون حس، بدون أفلام، تحمل كامل للمسؤولية، دون تبرير، دون حماية لوزيرك المتورط، دون تنصل و تتفيه للقصة و إختراع مؤامرة وهمية يسوقها أنصارك، بل خطوات عملية جدية.
هذه أول نقطة مضيئة لحكومتك، أهم ما فيها أنها تصنع تقاليد جديدة للدولة التونسية فالثورة تخرق طابو جديد : نعم الوزير المتهم بالفساد يقال في نهاره و يتعدى للقضاء يقول فيه كلمته و تقاليد جديدة في محاربة الفساد : الدروج يتنظف من فوق و المليانة؟ ما تشقشق.
يعطيك الصحة.””
